తీవ్రంగా బ్రతుకు ...Live inTENSEly!!

నిన్ను మరచి ప్రేమించావా?

నిన్ను మరచి ప్రేమించావా, దేనినైనా / ఎవరినైనా ఇంతవరకు !?
                                      - చలం గారి Musings లో ముగింపు.
అది ప్రశ్నో, జవాబో... తెలియదు.

వెంటాడే వాక్యం!!

భావాలు, భాషలూ ...

అరవై ఏళ్ళ క్రితం బుచ్చిబాబు గారు రాసిన "చివరికి మిగిలేది"...
నేను మొదటిసారి చదివిన ఇరవయ్యేళ్ళ తర్వాత మళ్ళీ చదువుతున్నా. పదాలవే, అర్థాలే మారినట్టు అనిపిస్తున్నాయి!!
ఆశ్చర్యం అదొక్కటే కాదు.
ఆ రెండు దశాబ్దాల జీవితం తర్వాత
నాకంటూ ఏదో కనుక్కున్నాననుకుంటానా,

అవన్నీ ఈ చలాలూ, అయాన్ రాండ్లూ, బుచ్చిబాబులూ ...
నేను చదవని ఇంకెందరో మహా రచయితలూ
ఎపుడో రాసేసారేంటా అనేది సంభ్రమాశ్చర్యం.

అలా అనుకుంటున్నప్పుడే, వివరించడానికన్నట్టు ...
'చివరికి మిగిలేది' లో మళ్ళీ ఈ వాక్యాలు:
"భావాలు చాలా విచిత్రమైనవి. మన సొంత భావాలు, ఎవరివోలా కలిపిస్తాయి.
ఎవరో చెప్పినవి, మన సొంతంలా కనిపిస్తాయి.
నిజంగా కొత్త భావాలంటూ లేవు.
ఆకలి, నిద్ర, దాహం, ఆకర్షణ, అసంత్రుప్తి, జీవితంపై మమకారం - అందరికీ ఇవి సమానమే. 

కొత్తవి ఎట్లా వస్తాయి?
భావాలు మానవులందరినీ ఏకం చేస్తాయి. వాటిని చెప్పడంలో ప్రయోగించే వివిధ భాషలు మానవుల్ని విడదీస్తాయి"

15th Oct 2012

వెలుగు, నీడలు ...అంతే!

"అతని నీడ ఎంతో బాగుంది. నీడలో అంత అందంగా కనిపించే రూపం అద్దంలో అలావుందేం?! "
- నిన్న రాత్రి "చివరికి మిగిలేది" లో ఇది చదివినప్పుడు, కపాలంలో ఏదో విచ్చుకున్నట్టయింది.

ఎందుకో అపుడే ... నండూరి గారి
"యెంకి ఎవ్వరని అడిగితే ..' వెలుగు నీడల' వేపు వేలు చూపింతు" గుర్తొచ్చింది.


కనిపించేది ఏదయినా వెలుగునీడల కలయికే కదా?

అంతా అవే... వెలుగూ - నీడా. ఎక్కువ - తక్కువా.
నీడయినా , వెలుగయినా ...ఆకారం ఒకటే కదా.

నీడల్లోని అందాన్ని మెచ్చుకునే మనం
వెలుగులో అదే రూపాన్ని ఎందుకు మెచ్చుకోలేం ?

అందుకే అన్నారేమో ...
"అందం- చూసే వారి చూపులో వుందని"
(Beauty is in the eye of the beholder)

17th Oct 2012

వెలుగు, నీడలు ...అంతే! (ఇంకా)
==================
బుచ్చిబాబు గారు, నండూరి గారే కాదు ...
మహాకవి శ్రీశ్రీ గారు కూడా మధనపడ్డారు
వెలుగు నీడల గురించి
నలుపు తెలుపుల గురించి ...
-Sreenath
19th Oct 2012

 Picture and Video Credits: endukoemo@youtube

ఎవరికోసం ?

నా కన్నీరు ఎవరికోసం కార్చినా
నా కన్నూ శుభ్రమవుతోంది
నా నవ్వు ఎవరికోసం జారినా
నా మనసూ సంతోషిస్తోంది !

ఆ పువ్వు తనకోసమే పూసినా
పరిమళం నాకూ వస్తూంది
ఆ జాబిలి ఎవరికోసం వచ్చినా
వెన్నెల నాకూ ఇస్తూంది !!

ఏ పిడుగు ఎందుకోసం పడినా
అడ్డొస్తే నన్నూ మాడ్చేస్తుంది
ఏ వర్షం ఎందుకోసం పడినా
వరదైతే నన్నూ ముంచేస్తుంది !!

ఈ విశ్వమంతా ఒకే శక్తి
తనను తానుగా గ్రహించలేక
నేనుగా - నువ్వుగా
అదిగా - ఇదిగా
అక్కడా - ఇక్కడా
అప్పుడూ - ఇప్పుడూ
అని విభజించుకుని
తన అంతులేని అవతారాలతో
తనే అనంతంగా ఆడుకుంటోంది !!

August 2012

మయసభ

ప్రపంచం పలు కోట్ల అద్దాల అతిపెద్ద అంతఃపురం
పలుకాలాలూ పలుదూరాలనిపించే అనంతపురం
ఒకరే అయినా పలువురిలా కనిపిస్తూ
ఒకటే అయినా వేరువేరు అనిపిస్తూ
కలిగించే భ్రమల సంభ్రమసభ
కలిపించే మాయల ఓ మయసభ !!

నేనే నీవుగా
వారుగా వీరుగా
వేరుగా వేరుగా
కలిగించే భ్రమల సంభ్రమసభ
కలిపించే మాయల ఓ మయసభ !!

నిజమయిన తేడా ఏమీ లేదు
అసలు తేడా ఎప్పుడూ లేదు 
ఉన్నదనిపించే తేడా అంతా
మన కనుల అద్దాల్లో
మనం చూసే అద్దాల్లో
మనకు చూపే అద్దాల్లో 

ప్రపంచం భ్రమల సంభ్రమసభ
ప్రపంచం మాయల ఓ మయసభ !!

July 2012

అంతటా ఒకటే శక్తి !

నన్ను నేను తెలుసుకోవాడానికే - నీవు
నిన్ను నీవు తెలుసుకోవాడానికే - నేను !

పలు నేనుల్లో పలు నీవుల్లో
పలు వాళ్ళల్లో పలు వీళ్ళల్లో
పలు వాటిల్లో పలు వీటిల్లో
పలు చోటుల్లో పలు వేళల్లో
తనను తాను తెలుసుకుంటూ
అంతటా ఒకటే శక్తి !

తననుంచి తనే దాక్కుంటూ
తనకోసం తనే వెతుక్కుంటూ
తనను తాను కలుసుకుంటూ
తనను తాను తెలుసుకుంటూ
అంతటా ఒకటే శక్తి !

నన్ను నేను గ్రహించడానికే - నేను కానిదంతా
నిన్ను నీవు గ్రహించడానికే - నీవు కానిదంతా !!

July 2012

అన్-కండిషనల్ ప్రేమ

పలుప్రయత్నాల తరువాత
తను నా ప్రేమకు ఒప్పుకుంది ....వావ్వ్ !
అన్-కండిషనల్గా ప్రేమించాలని
ఒన్ కండిషన్ నాకు పెట్టేసింది ....కెవ్వ్ !!

August 2012

హరివిల్లు

ప్రేమ హరివిల్లుకి
అటు చివర నీవు... ఆరంభంలో
ఇటు చివర నేను.... అంతంలో

ఆరంభం వేపు నేను
అంతం వేపు నీవు
రోజంతా ప్రయాసల ప్రయాణం
చేరి చూసుకుంటే, అదే దూరం
రాత్రికి నీవక్కడే, నేనిక్కడే
తరగని దూరం ...విరహం

విరహపు హరివిల్లుకి
అటు చివర నీవు, అంతంలో
ఇటు చివర నేను, ఆరంభంలో

July 2012

చుంబనసుమాలు

నువు  తెచ్చిన  పూవులు  వాడి పోయినా

నువు  ఇచ్చిన  ముధ్దుల  వేడి పోలేదు !! 

మలి సంధ్య

సూరీడు ఆ కొండల మధ్య దూకినట్టుంది
తను పోవడానికి ఎవరూ కారణం కాదని
పడమటి ఆకాశం మీద వెలుగు లేఖలు రాసినట్టుంది

నేటి మీద విరక్తో ..
రేపటి మీద ఆశో ...!!

ఎందుకు సూరీడా,
ప్రతిరోజూ మరణిస్తావు ?
ప్రతిరోజూ జన్మిస్తావు !?

Sreenath 
July 2012

అందం - ఆనందం

ఓ గడ్డిపూవా,
ఆనందం - అటూ ఇటూ ఎగిరే సీతాకోకచిలుక కాదు.
నీ గుండెల్లోనే దాక్కున్న ఆ కొంచెం మకరందం !

అందం తన రంగురంగుల రెక్కల్లోనే లేదు.

నీ చిన్ని చిన్ని రెక్కల్లో లాలిత్యం అందం !

మే'మందమ'నే అందమానందాలను అందలమెక్కించకు...
నీ మదిలోకే తొంగిచూడు...నిదానంగా నిశ్శబ్దంగా !

ఆక్కడే ఉన్నాయవి ..
నీవెక్కడో వెతుక్కుంటున్నావని తెలిసి
తమలో తామే నవ్వుకుంటూ .....
గంధంగా మకరందంగా
అందంగా ఆనందంగా
అనంతంగా !!

May 2012

మమేకం

ప్రతి రాత్రీ ఇంటి పైకప్పుమీద
పడుకుని చూస్తాను...ఆకాశం వేపు
చుక్కల వేపు, వుంటే చంద్రుని వేపు.
ఏవో విశ్వరహస్యాలను విప్పాలని కాదు.
ఎక్కడో వున్నా నువ్వూ వాటినే
చూస్తూ వుంటావనే ఆశతో !
ఒకే చోట లేకున్నా, ఒకే వేపు
చూస్తున్నామనే భావంతో !!
అదీ ఒక విధంగా
మనమేకమవడం అనుకుంటూ ....

June 2012

నీవుంటే...

వందలమందిలో వున్నపుడు
ఒంటరితనం ఆవహించడం,

నీతో వున్నపుడు ప్రపంచమంతా
నాతో వున్నట్టు అనిపించడం ....

సముద్రాలు తీర్చలేని దాహమేదో
నీవు నా దోసిలిలో పోసే నీరు తీర్చినట్టు !!

June 2012

నన్ను తెలుసుకుందామని

నిన్ను తెలుసుకుందామని
రాలేదు నీ దగ్గరికి
నన్ను తెలుసుకుందామని వచ్చాను !     

నేను చూసేది
అర్థం కోసం కాదు

స్వ-అర్థం కోసం !

నేను వెతికేది
అందం కోసం కాదు
అద్దం కోసం
అబద్దం కాని అద్దం కోసం !!

6th October 2012

చినుకులనివ్వండి

నగరంలో వాన,
బయటికెళ్ళలేక టి.వి. పెడితే-
ఎడ్వర్టయిజుమెంటుల, అర్థంకాని వార్తల
ఫ్లాష్ న్యూసుల, పలు వ్యూసుల

మీడియా జడివాన
ఎటు చూసినా
జనాల కడగండ్ల
వడగండ్ల వాన

వేలాది అనుభవాల
వరదల్లో- అనుభూతులూ
సూక్ష్మవిషయాల సమీక్షల
సునామీల్లో- స్పందనలూ
కొట్టుకుపోతున్నాయి

వాన వెలిసాక చూస్తే
మనసుల్లో ఏదో రొద
పొరలుగా తెరలుగా
పేరుకున్న బురద

కడుక్కోవాలి
ఏ కవులో దయచూపి,
నాక్కొన్ని క్షీరాక్షరాల
చినుకులనివ్వండి !!

 

 23rd September 2012

కరంటంటే ?

కరంటంటే ?
=======
బల్బు చుట్టూ చేరిన దీపపు పురుగులు,
వాటి కోసం కాచుక్కూచ్చున్న బల్లికీ
మూలగా గూడుకట్టుకున్న సాలీడుకీ
ఆహారపు ఆధారం.

చెట్లు లేక, గాలి రాక,
ఉక్కపోతతో అల్లాడే
పట్నపుజీవికి ఫ్యాను

నగరంలో చిరుద్యోగుల్ని
పనిచోటుకీ ఇంటికీ
చేర్చే లోకల్ ట్రైను

కోట్లాదిమంది అండర్-ఎంప్లోయ్డ్
జనాలు అదే "పనిగా" భ్రమించేలా
టన్నుల కొద్దీ సీరియల్సూ, న్యూసూ
చూపించే టీవీ

నే పని చేసే ఫ్యాక్టరీలో
నడిచే యంత్రం
పని చేస్తేనే నెలాఖర్లో
నాకొచ్చే జీతం

ఆషాడమాసాలకంటే కరంటు కోతలు కష్టం
లేనప్పుడే విలువెక్కువ.
ఆ విరహం కడు బాధ
సకల జనుల వ్యధ

తనకు బానిసను చేసి
జీవితంలో భాగం చేసి
ఇపుడు ఇవ్వలేమంటే
ఎలా ప్రభుత్వమా??

 

4th September 2012

తరంగాంతరంగం (అంతిమ భాగం)

తరంగాంతరంగం (అంతిమ భాగం)
=====================
అల అలసిపోతుంది ... ఆగిపోదు !
అల కదిలిపోతుంది, కలిసిపోతుంది, ...కరిగిపోదు !!

చీకటి మబ్బులు కప్పుకుని
ప్రపంచమంతా నిదరోతున్నా
నేను మేలుకునే !
ఉలిక్కి-పడుతూ... లేస్తూ
పడుతూ... లేస్తూ
తీరాన్ని చూస్తూనే !!

కొన్నిసార్లు పాటలు
కొన్నిసార్లు నిట్టూర్పులు
నిదుర మాత్రం రాదు

నిద్రలేమి వల్ల బలహీనత
అయితేనేం నాది ప్రేమ
అలది ప్రేమ, అలవికాని ప్రేమ !

తరంగానిది తరతరాల ప్రేమ
తరంగానిది తరగని ప్రేమ
తీరంపై తీరని ప్రేమ !!

 

14th June 2012

తరంగాంతరంగం - 2

తరంగాంతరంగం - 2
=============
ప్రతి రాత్రీ విరహపు గాలి పాటలు తీసుకొస్తాను
అలల పెదవులతో తీయగా తనకు వినిపించడానికి
తన తనువులోని ప్రతి రేణువునూ చుంబిస్తాను

తన యదపై వాలి, నా అలసట పోవడానికి

సముద్రం పోటెత్తినపుడు తన కౌగిలింతలో నే విహరిస్తాను
అదే సంద్రం వెనక్కి లాగుతుంటే తీరంతో అంతలోనే విరహిస్తాను
ప్రార్థనా గీతాలాలపిస్తాను, తన పాదాల మీద విలపిస్తాను

తనకోసపు నా అనంత యాత్రల్లో
ఎన్నిసార్లు నే కొండల బండల మీద విరిగాను !
అయినా నవ్వుతూ ఎన్ని గిలిగింతలు పెట్టాను....
అవెప్పుడూ తిరిగి నవ్వలేదింతవరకూ !!

తనకు కానుకలకోసం, సాగరగర్భం లోంచి
ఎన్నిసార్లు నే ముత్యాలు దొంగిలించి తెచ్చాను !
తీసుకుందంతే ఏమీ మాట్లాడకుండా
తనెప్పుడూ తిరిగి ఇవ్వలేదింతవరకూ !!

ఆయినా ప్రేమిస్తా తనను,
తరాలనుండీ తనది నిశ్శబ్దపు స్వాగతం
నిరంతరంగా నా గమ్యం - తీరం !!

 

8th June 2012

తరంగాంతరంగం (తరంగపు అంతరంగం) - 1

తరంగాంతరంగం (తరంగపు అంతరంగం) - 1
============================
తీరం, నేనూ ప్రేమికులం
దశాబ్దాల శతాబ్దాల విరహం;
కలిసి క్షణం గడవకముందే
శశికిరణాల పగ్గాలతో లాగేస్తూంది సంద్రం

దివీభువీ కలిసే ఆద్యంతం నుంచి 'వెండి' వెలుగులను
నా అలల నురగలతో మోసుకొస్తాను
తీరపు ఇసుకల 'సువర్ణం'తో కలిపి
మేమేకమై మమేకమైన రసానుభూతికి !

తరతరాల తీరపు దాహాన్ని నే తీరిస్తే,
నా జోరునూ హోరునూ తగ్గించి తను నవ్వుతుంది
సముద్ర ఘోషను సంగీతంగా మారుస్తూ

వడివడిగా వస్తాను
తీరం ఒడి చేరడానికి.
తనువు తాకక ముందే
తనివి తీరక ముందే,
నా వేలవేల చిట్టి అలల
వేళ్ళతో వీడ్కోలంటూ
తిరిగెళ్ళిపోతాను!

కలిస్తే వుండిపోలేక,
వెళితే తిరిగెపుడు కలయికో తెలియక,
నా గమనంలో కసి, హోరు, అసహనం...
తనదేమో మూర్తీభవించిన సహనం, నిశ్శబ్దం !!

 

- 7th June 2012

కురిసే కళ్ళు ...

చాలా పొద్దుపోయింది
ఆకాశంలో బోలెడు మబ్బులు
నీకోసం నా ఎదురుచూపుల్లా !
ఇంకా నీవు రాకుంటే
మబ్బులే కాదు
కళ్ళూ కురుస్తాయి !!

- 17th June, 2012

గూగుళ్ళే గుళ్ళు !

నేటి జనులకు
నెట్-జనులకు
గూగుళ్ళే గుళ్ళు !
ఫేస్బుక్కులే వేదాలు !!

- 6th July 2012

మొన్న రాత్రి

బిజీ బిజీ వల్లకాడులా వుంది (pub)పబ్బులో వాతావరణం !
వద్దనుకున్న ఙ్ఞాపకాలను సామూహికంగా దహనం చేయడానికి
సుందరంగా తీర్చిదిద్దిన స్మశానం సెట్టులా వుంది.

స్మృతుల చితి రగలడానికి తలో మందూ వేస్తున్నారు.
మనుషులను కాల్చడానికి కిరోసినూ, డీజిలూ, పెట్రోలుల్లా...
మనసులను కాల్చడానికి విస్కీ, బ్రాందీ, రమ్మూ
ఇంకా బోలెడు మిశ్రమాలూ!

ఆ కాలుతున్న వెలుగుల్లోనే నృత్యాలు,
చితుల చిటపటలు వినిపించకుండా సంగీతం.

గతం తాలూకు ఙ్ఞాపకాలూ - వర్తమానంలో స్పందనలూ -
భవిష్యత్ గురించి ఆలోచనలే జీవితమయితే,
వాటన్నింటినించీ దూరంగా పోయే ఈ ప్రయత్నం
ఒక సామూహిక ఆత్మహత్యాయత్నంలా వుంది.

నచ్చని వాస్తవాల బూడిదల్లోంచి
అందమయిన అవాస్తవాల పూలు
పుడతాయేమోనని చేస్తున్న
'ఎమోషనల్ అత్యాచారం'లా వుంది.

రంగుల్లేని వెలుగునీడల జీవితాలను
ముదురు వర్ణాల మత్తు అద్దాలతో
చూసుకునే ప్రయాసలా వుంది.

 

- 17th May 2012

 

నీ ఙ్ఞాపకాల సువాసన !

నువ్వు పంపిన సంపెంగ మొగ్గలు
కొన్ని కొన్నిగా విచ్చుకొంటున్నాయి
మబ్బులు పట్టిన రాత్రి ఆకాశంలో
అక్కడక్కడా నక్షత్రాల్లాగా.
గదంతా నీ ఙ్ఞాపకాల సువాసన !

నువ్వున్నపుడు పడకమీదా
ఆమూలా ఈమూలా కనిపించి
చికాకు పెట్టే నీ వెంట్రుకలు కూడా
ఇపుడు ప్రియమనిపిస్తున్నాయి
అటూ ఇటూ చూస్తున్నా
ఎక్కడయినా వున్నాయేమోనని !!

- June 2012

'పెట్ బాటిల్స్'లో ప్రేమ

గుసగుసల ప్రేమను గుర్తించే మనుషులు

అదే ప్రేమ అరచి చెప్పేస్తే చెవులు మూసుకుంటారు !

జీవనదుల్లా ప్రవహిస్తే పట్టించుకోక

ప్రేమను కూడా "పెట్ బాటిల్స్"లో కావాలంటారు !!