ఎవరికోసం ?

నా కన్నీరు ఎవరికోసం కార్చినా
నా కన్నూ శుభ్రమవుతోంది
నా నవ్వు ఎవరికోసం జారినా
నా మనసూ సంతోషిస్తోంది !

ఆ పువ్వు తనకోసమే పూసినా
పరిమళం నాకూ వస్తూంది
ఆ జాబిలి ఎవరికోసం వచ్చినా
వెన్నెల నాకూ ఇస్తూంది !!

ఏ పిడుగు ఎందుకోసం పడినా
అడ్డొస్తే నన్నూ మాడ్చేస్తుంది
ఏ వర్షం ఎందుకోసం పడినా
వరదైతే నన్నూ ముంచేస్తుంది !!

ఈ విశ్వమంతా ఒకే శక్తి
తనను తానుగా గ్రహించలేక
నేనుగా - నువ్వుగా
అదిగా - ఇదిగా
అక్కడా - ఇక్కడా
అప్పుడూ - ఇప్పుడూ
అని విభజించుకుని
తన అంతులేని అవతారాలతో
తనే అనంతంగా ఆడుకుంటోంది !!

August 2012