పిల్లలు - కవితలు

మగకవులు కూడా కనగలిగే
అందమయిన ఆడపిల్లలు కదా కవితలు!
కవులు కానివారు కూడా కనగలిగే
అందమయిన కవితలు కదా ఆడపిల్లలు!!

తరతరాల తీరని దాహం

ఎన్ని తరాల దాహమో సంద్రానిది..
నదులను నిరంతరంగా  తాగేంతది!

ఎంత తరగని ప్రేమో నదిది..
అలుపెరగని సాగరసంగమమంతది!   

 

తరతరాల తీరని దాహం ప్రేమ!!

దేశమంటే ??

ఇండియా మీద ప్రేమ - ఇండియన్ల మీద లేదు!
 
ప్రాంతాల మీద ప్రేమ -ప్రజల మీద లేదు!

మతాల మీద ప్రేమ -మనుషుల మీద లేదు!


మట్టి మీద ప్రేమ- మనసుల మీద లేదు!!

దేశమంటే మట్టా? మనుషులా ??

ద్వైతం

దిగంతాల వైపు, అనంతాల వైపు పరుగు నీది
ఈ తనువు మెల్లగా అంతం వేపు అడుగులేస్తూంది
తనకోసం వేచివుండలేని నీవు
వేగం సాధ్యం కాని తనువు
ఇదే, నా మనసా, ఖేదం అంటే !

స్వర్గాలేవో పిలుస్తున్నట్టు నీవు పైపైకి
గురుత్వాకర్షణ వల్ల తను కిందికిందికి
తనను వోదార్చని నీవు
నిన్ను మెచ్చని తనువు
ఇదే, నా మనసా, భేదం అంటే !

నువ్వు ఙ్ణానివి, తనకు అర్థమే కాదు
నువ్వు రాజీ పడవు, వొప్పుకోదు తనువు
ఇదే, నా మనసా, వేదనంటే !
ఇదేనా, మనసా, వేదనంటే ?!

-Sreenath
21st June, 2012 

నాకెందుకు !

ఊపిరి ఎంగిళి కాదా ?
ఎవరో పీల్చి వదిలిన గాలి
నాలోకీ చేరడం లేదా ??

ఎక్కడెక్కడో పారిన నీరు
ఏదో ఒక రూపంలో
నేనూ తాగడం లేదా ?

ఎవరో నాటిన చెట్టునుంచి
వచ్చే పళ్ళను
నే తినడం లేదా ?

పీల్చే గాలికీ, తాగే నీటికీ,
తినే తిండికీ లేని
కులం, మతం, ప్రాంతం,
జాతీ, వర్ణం, వర్గం...
అదే గాలీ-నీరూ-తిండితో
బ్రతికే నా శరీరానికెందుకు ?
ఆ బొందిలోని నా మనసుకెందుకు ??
నాకెందుకు ? నాకెందుకు !!

-Sreenath 
15th July 2012

గెలుపు ప్రశ్నదా ? జవాబుదా ??

గెలుపు ప్రశ్నదా ? జవాబుదా ??
ప్రశ్నలు పాతవే !
పరిస్థితులు మారితే
కొత్త సమాధానాలు వెతుక్కుంటానేమో !!

ఎందుకు ? ఎలా?
అంటే ఏమిటి? ఏది కాదు?
ఎప్పుడు? ఎక్కడ?
పలు, పలురకాల, పలుమార్ల ప్రశ్నలు !

నన్ను నేను అడుగుకోని
జీవితాల్లో, రచనల్లో, మాటల్లో,
సమాధానాలు వెతుక్కోని
ప్రశ్నలు ఇంకేమయినా మిగిలాయా ?

జీవితాంతం ప్రశ్నలే
తోకతెగినా పడగవిప్పి
మెడకు చుట్టుకున్ననాగుల్లా ?!
వూపిరి ఆడనీయని
బిగుతు ప్రశ్నల కొండచిలువలు

శాంతి అంటే
ప్రశ్నలు లేకపోవడమా?
పరిణితి అంటే
ప్రశ్నలు తగ్గడమా ?
జవాబులు పెరగడమా ?

-Sreenath
27th July, 2012

జారిపోయే జీవితం  
జారి పోయే చిన్ని జీవితంలో
ఏది నిత్యం - ఏది అనిత్యం ?
ఫుల్-స్టాప్ వచ్చే ముందు ...
ఈ విశ్రాంతి, ఒక విరామచిహ్నం!

 

నామనసూ - నువ్వు- మందూ - మిగతా లోకం

నామనసూ - నువ్వు- మందూ - మిగతా లోకం
నా అంతఃపురంపై సదా లోకం దాడులు
నువ్వు నాతో వుంటే భయం లేదు
మనస్సులో వుంటే మందు ముసుగే కోటగోడ !

 

మనస్సు మీద పుట్టుమచ్చ

మనస్సు మీద పుట్టుమచ్చ
నామనసుపై విడిచెళ్ళిపోయిన  పుట్టుమచ్చ
నీవు అరకొరగా పొడిచెళ్ళిపోయిన పచ్చ. 
చూపుసూదుల్తో గమ్మత్తుగా గుచ్చుతుంటే
ప్రేమనుకున్నాను - పిచ్చివాడినే  
ప్రాక్టీసనుకోలేదు !!

నాతో ప్రాఫిట్లేదనా..
ప్రపంచం మీద పడ్డావు?
ఎపుడోరోజు తెలుసుకుని తిరిగొస్తావని,
పచ్చిగానే వుంచుతున్నానా పచ్చబొట్టుని -
ఎండకుండా తాగితాగి గుండెనిండా !
అయినా, గుండెపై నీపచ్చబొట్టు కోసం తాగితే ..
కాలేయం చెడి ఈపచ్చకామెర్లు రావడమేంటే ?!

                                                                               ---శ్రీనాథ్

గాయంలా వుండు

మానుపుకోవాలనిపించని  గాయం నీవు 
 
నువ్వీ గుండె బయటికెళ్తూ చేసావే, గాయం ...

మందు.. మానుపుకోవడానికి కాదు 

తడిపి తడిపి  పచ్చిగా వుంచాలని

ప్రేయసిలా పోయినా, గాయంలా వుండు !